Emirjon Senja
Krahas problemeve me energjinë dhe rritjen e përgjithshme të çmimeve pas luftës në Ukrainë, Europës tashmë i është dashur të përballet edhe më shumë me një rrezik tjetër: Fushtatat dezinformuese, përmes të cilave tentohet krijimi i realiteteve të reja me qëllim hapjen e disa fronteve për Perëndimin.
Po ashtu, gjatë muajve të fundit shtete të Europës jug-lindore janë përballur me tensione të mëdha ndëretnike dhe politike duke bërë që të rrezikohen maxhoranca, madje edhe të bien qeveri.
Kështu për shembull, ndërkohë që retorika e luftës dhe ndarjes është gjithnjë prezente në Bosnje Hercegovinë, qeverisë në Maqedoninë e Veriut iu desh të përballej me protesta të mëdha, ku një numër i madh prej atyre që dolën në shtet e shfrynë frustrimin te bizneset e shqiptarëve, ndërkohë që qeveria e Dritan Abazoviçit e ka humbur tashmë maxhorancën në Kuvend pas marrëveshjes me Kishën Serbe.