“Junk Folder” është dokumentar që trajton çështjen e dezinformimit dhe se si ai dëmton gazetarinë cilësore. Dokumentari bazohet në përvojën dhe intervistat e gazetarëve në katër vende të Ballkanit, të cilët dëshmojnë raste emblematike të dezinformimit, duke shpjeguar si lindin lajmet e rreme dhe kush fshihet pas tyre. Roli i gazetarëve investigativë dhe i organizatave të verifikimit të fakteve është primar në këtë dokumentar.
Dezinformimi nuk njeh kufij dhe tema e “Junk Folder” tregon pikërisht se si përhapet dezinformimi në Ballkanin Perëndimor. Gjithashtu, dokumentari shpërfaq edhe nivelin e pamjaftueshëm të edukimit mediatik si një nga arsyet kryesore për përhapjen e dezinformimit dhe vështirësitë në dallimin e lajmeve të rreme.
Dokumentari, me regjisor Alen Simic dhe realizuar nga Mediacentar Sarajevo dhe SEENPM, bazohet në intervista me gazetarë dhe ekspertë të medias në Shqipëri, Serbi, Bosnje dhe Hercegovinë dhe Maqedoninë e Veriut. Filmi u realizua në kuadrin e projektit rajonal ‘PËRBALLJE: Përpjekje e shoqërisë civile për të konsoliduar lirinë e medias dhe për të luftuar dezinformimin dhe propagandën e urrejtjes në Ballkanin Perëndimor dhe Turqi.’ Projekti zbatohet me mbështetjen financiare të Bashkimit Europian nga organizatat partnere SEENPM, Instituti Shqiptar i Medias, Mediacentar Sarajevo, Kosovo 2.0, Instituti Malazez i Medias, Instituti Maqedonas për Median, Shkolla e Gazetarisë e Novi Sad, Instituti i Paqes dhe Bianet.