Çmimi i parë
Inva Hasanaliaj, gazetare, mori çmimin e parë në konkursin “Posteri më i mirë për Edukimin për Median dhe Informacionin,” të zhvilluar nga Instituti Shqiptar i Medias. Çmimi i dytë i shkoi Hajdi Bengut, ndërsa çmimin e tretë e mori Ejona Limanaj. Çmimet ishin përkatësisht në vlerën 700, 500 dhe 300 USD.
Çmimi i dytë
Qëllimi i këtij konkursi ishte nxitja e edukimit për median dhe informacionin nëpërmjet mjeteve vizuale, me temën “Edukimi për median dhe informacionin për të gjithë.” Në konkurs pati 22 aplikime nga të rinj të moshës 18-30 vjeç, të cilët konceptuan postera që përçojnë mesazhet e rëndësisë së edukimit mediatik te qytetarët. Aplikimet u shqyrtuan nga një juri e përbërë nga tre anëtarë: Lutfi Dervishi, gazetar, Irena Myzeqari, lektore në shkencat e komunikimit, dhe Gejsi Tafa, lektor dhe dizajner kreativ. posterat u vlerësuan si nga përmbajtja, ashtu dhe nga paraqitja, duke pasur parasysh kritere si rëndësia e temës së paraqitur, konceptimi dhe qartësia e saj, por edhe estetikën dhe realizimin nga ana vizuale të posterit. Posterat fitues do të printohen dhe do të shpërndahen në universitete në vend.
Çmimi i tretë
Ky konkurs është pjesë e projektit “Zhvillimi i Edukimit për Median dhe Informacionin në Universitetet Shqiptare,” të zbatuar nga Instituti Shqiptar i Medias, me mbështetjen financiare të Ambasadës Amerikane në Shqipëri.