Në fushën e gazetarisë, saktësia e informacionit përbën themelin e besueshmërisë. Me përhapjen e përdorimit të IA për të krijuar përmbajtje, për të verifikuar fakte, dhe për të analizuar të dhëna, siguria për saktësinë e informacionit është më e rëndësishme se kurrë. IA mund ta përmirësojë procesin e verifikimit duke krahasuar shpejt fakte, duke identifikuar pasaktësi dhe ndihmuar gazetarët me grumbullimin e të dhënave nga burime të ndryshme. Megjithatë, mjetet IA kërkojnë patjetër mbikëqyrje njerëzore për të siguruar që informacioni që ato ofrojnë është i saktë. IA duhet të shihet si një mjet që plotëson gjykimin njerëzor, jo si një zëvendësues i tij.
Një nga mënyrat më të rëndësishme se si IA mund të ndihmojë në gazetari është përmes verifikimit të të dhënave. Mjetet IA mund të skanojnë automatikisht një sasi të madhe informacioni (përmbajtjeje) nga interneti, duke krahasuar burime dhe duke verifikuar faktet kundrejt databazave të njohura. Kjo mund të jetë e dobishme sidomos për mbulimin e ngjarjeve të papritura, ku shpejtësia është thelbësore dhe rreziku i informacionit të pasaktë është i lartë. Me ndihmën e IA, mund të pikasen pasaktësitë, mund të sugjerohen korrigjime dhe madje mund t’u jepet ndihmë gazetarëve që të zbulojnë hollësi që mund të jenë lënë mënjanë. Megjithatë, këto mjete duhet të përditësohen vazhdimisht për të shmangur gabime në procesin e verifikimit.
Pavarësisht përfitimeve, sistemet e verifikimit të bazuara në IA nuk mund të zëvendësojnë mendimin kritik njerëzor. Pajisjet dhe programet mund të analizojnë modelet dhe të dhënat, por ata nuk e kanë as të kuptuarit kontekstual dhe as konsideratat etike që vetë gazetarët sjellin. Për shembull, IA mund ta etiketojë një fakt si të gabuar vetëm bazuar në disa të dhëna, pa pasur njohuri që informacioni mund të jetë kontekstualisht i saktë në një situatë të caktuar. Prandaj nevojitet që gazetarët ta përdorin IA si një mjet, por jo për të zëvendësuar të menduarit kritik dhe marrjen e vendimeve etike.
Po kështu, roli i IA përmban edhe kufizimet e mundshme të saj. Sistemet automatike që bazohen në algoritme mund të jenë të prirura ndaj paragjykimeve të caktuara sepse ato mbështeten tek të dhënat me të cilat ato trajnohen. Nëse sistemet IA “ushqehen” me të dhëna të parregullta ose të paracaktuara, por të pasakta, ato mund të përhapin pa dashje pasaktësi. Çdo gazetar duhet të qëndrojë vigjilent për t’u siguruar që mjetet IA që përdoren në redaksitë e lajmeve apo punën e tyre të përditshme të mos përforcojnë edhe më shumë paragjykimet ekzistuese dhe as të përhapin të pavërteta.
Në përgjithësi, IA mund të jetë një pasuri e paçmuar për gazetarinë sepse mund të ndihmojë për të përmirësuar saktësinë dhe duke thjeshtuar proceset e verifikimit të një gazetari apo redaksie. Megjithatë, ajo duhet të përdoret patjetër e kombinuar me ekspertizën e njeriut për t’u siguruar që përmbajtja të mbetet e vërtetë dhe e besueshme.