Një nismë e përbashkët e Qendrës Res Publica dhe Këshillit Shqiptar të Medias (KSHM) u përqendrua në forcimin e gazetarisë etike në kuadrin e projektit “Promovimi i Etikës dhe Vetërregullimit në Mediat Lokale: Sfida ndaj Dezinformimit.” Nisma u përqendrua në dy qytete shqiptare – Shkodër dhe Vlorë. Qëllimi i projektit ishte mbështetja e gazetarisë etike dhe nxitja e vetërregullimit në median lokale, veçanërisht në vende ku dezinformimi, presioni financiar dhe ndikimi editorial mund të përballen me sfida të mëdha.
Qendra Res Publica fokusohet te përforcimi i transparencës, lirisë së shprehjes, dhe sigurimin e mbështetjes ligjore për gazetarët që përballen me presion ose censurë, ndërsa Këshilli Shqiptar i Medias është organi i vetëm vetërregullues mediatik në Shqipëri, duke bërë bashkë gazetarë të angazhuar për standarde etike dhe profesionale. Këto dy organizata bashkëpunuan për të zhvilluar një seri seancash dialogu të strukturuar në të dy qytetet.
Çdo seancë përfshiu gazetarë lokalë nga media të ndryshme, përfaqësues të shoqërisë civile, dhe ekspertë në etikën mediatike. Diskutimet u përqendruan në tre tema kryesore – si perceptohet etika dhe vetërregullimi, çfarë pengon zbatimin e tyre, dhe çfarë idesh praktike mund të ndihmojnë në realitetin e medias lokale.
Këto takime evidentuan sfidat si dhe gatishmërinë për ndryshim. Gazetarët diskutuan për pengesa reale si mungesa e pavarësisë editoriale, mungesa e kontratave formale, paqëndrueshmëria financiare – por shprehën gjithashtu dëshirën për standarde etike të përbashkëta dhe përgjegjësi mes kolegësh.
“Rezultati më i madh ishte mbledhja e shumicës së gazetarëve lokalë nën një çati për të diskutuar vetërregullimin, ndërtuar sinergji, dhe vlerësuar mënyrën më të mirë për të qenë pjesë e valës së re të standardeve të Journalism Trust Initiative,” tha Koloreto Cukali nga Këshilli Shqiptar i Medias.
Pjesëmarrësit nënvizuan si kufizimet, ashtu edhe aspiratat lidhur me këto iniciativa. “Nuk mund të ndërtojmë struktura formale, por mund të kemi disa rregulla mes nesh,” tha një nga pjesëmarrësit në aktivitetet e projektit. Shumë prej tyre theksuan se kanë nevojë për udhëzime se çfarë është etike në situata reale, edhe pse ruajtja e etikës si prioritet në jetën e përditshme nuk është gjithmonë e realizueshme.
Ky projekt u financua përmes skemës së grantdhënies në kuadër të projektit “Our Media”, i cili ka mbështetur 21 projekte lokale në gjithë Ballkanin Perëndimor.
Projekti rajonal “Media Jonë: Një projekt i shoqërisë civile për të nxitur edukimin për median dhe aktivizmin, kundër polarizimit, në dobi të dialogut” zbatohet me mbështetjen financiare të Bashkimit Evropian nga SEENPM, Instituti Shqiptar i Medias, Mediacentar Sarajevo, Këshilli i Medias i Kosovës, Instituti i Medias i Malit të Zi, Instituti i Medias i Maqedonisë, Shkolla e Gazetarisë Novi Sad, Instituti për Paqe, dhe Bianet.
Ky artikull është realizuar me mbështetjen financiare të Bashkimit Evropian. Përmbajtja e tij është përgjegjësi e vetme e Institutit Shqiptar të Medias dhe SEENPM dhe nuk pasqyron domosdoshmërisht qëndrimet e Bashkimit Evropian