Të martën, më datë 23 Janar, u zhvillua takimi me aplikantët fitues në Thirrjen për Organizimin e Aktiviteteve të Përbashkëta, njëkohësisht pjesëmarrës në sesionet e rrjetëzimit online, të zhvilluara gjatë muajit Dhjetor. Thirrja synonte të forconte dhe të nxiste bashkëpunimin midis organizatave të Jugut dhe të Veriut të Mesdheut, me në fokus të shtuar përfshirjen dhe aktivizimin e organizatave të Rrjetit Shqiptar, si një nismë e ndërmarrë nga Kreu Shqiptar i Rrjetit.
Gjithësej u shqyrtuan 15 aplikime , nga të cilat u përzgjodhën 7. Aplikimet e përzgjedhura , të cilat do të shpërblehen me nga 500 euro pas përfundimit të aktiviteve, bëjnë bashkë gjithësej 15 organizata anëtare të Fondacionit: përkatësisht 5 organizata nga Rrjeti i Libanit, 2 organizata nga Rrjeti i Luksemburgut, 1 organizatë nga Rrjeti i Marokut dhe 7 nga Rrjeti Shqiptar.
Aktivitete e propozuara, në përputhje dhe me fushëveprimin e organizatave bashkëpunëtore, bien në këto fusha tematike: diversiteti, gjinia, edukimi dhe media, angazhimi i të rinjve në rajonin Euro-Med dhe dialogu ndërkulturor. Për sa i përket llojit të aktiviteteve , ka një larmishmëri, duke nisur që nga prodhimi i materialeve të tilla si video, deri në trajnime, webinare dhe konkurse.
Takimi online pati 17 pjesëmarrës, të cilët patën mundësi të merrnin një informacion më të detajuar mbi detyrimet e secilës palë të përfshirë në propozim dhe më vonë në implementimin e aktiviteteve, mbi afatet e implementimit dhe çështjet e vizibilitetit të aktiviteve.
Këto nisma, në dukje premtuese, do të kemi mundësinë t’i shohim të marrin jetë duke filluar nga Janari, deri në Mars. Për më shumë informacion dhe përditësime lidhur me këto aktivitete, na ndiqni në rrjetet tona sociale.
Linku i Instagram: https://www.instagram.com/alf.shqiperi/
Linku i Facebook: https://www.facebook.com/alf.shqiperi/posts/pfbid0cVAbCHp7UHYfTGpM42FY3HaGL3G9a1ef3ZaSTCnwfhZdXbSDAg7SL6fo7HDM1BNrl
Linku i LinkedIn: https://al.linkedin.com/in/alfalbania
#weareALF #RrjetiShqiptarALF #EuroMed #ThirrjePërPropozime #Diversitet #Edukimi #Media #DialogNdërkulturor
