Në një botë gjithnjë e më të ndërlidhur dixhitalisht, ku kufijtë mes jetës personale dhe asaj profesionale zbehen, siguria dixhitale është shndërruar në një domosdoshmëri për këdo, veçanërisht për gazetarët që përballen me rreziqe të shumta si ndërhyrje të paautorizuara, survejim, phishing apo ngacmime online.
Ky udhëzues i përgatitur nga Instituti Shqiptar i Medias synon të ofrojë një qasje praktike dhe gjithëpërfshirëse ndaj mbrojtjes dixhitale, duke theksuar rëndësinë e ruajtjes së të dhënave, sigurisë së pajisjeve dhe njohjes së legjislacionit përkatës si pjesë të etikës profesionale dhe të drejtës për informim të sigurt.
Përtej masave teknike, ai trajton edhe çështje si të drejtat e autorit, plagjiatura dhe ndikimet e inteligjencës artificiale, duke theksuar se përdorimi i mjeteve të përshtatshme, praktikat e sigurta dhe vetëdijësimi janë thelbësorë për gazetarinë e përgjegjshme dhe qytetarinë kritike.
Në thelb, udhëzuesi synon të shërbejë si një mjet praktik për ata që duan të mbrojnë veten dhe të ushtrojnë me ndërgjegje rolin e tyre në shërbim të së vërtetës.