Java e Shoqërisë Civile (JSHC) është një aktivitet kombëtar tematik i përvitshëm organizuar nga Qendra Kombëtare Burimore për Shoqërinë Civile, Partnerët Shqipëri për Ndryshim dhe Zhvillim, që i dedikohet promovimit të veprimtarisë së organizatave të shoqërisë civile në vend dhe kontributit të tyre në shoqëri.
Java, e cila do të zhvillohet përgjatë periudhës 27 maj-2 qershor 2024, krijon mundësi për të gjithë aktorët e shoqërisë civile, për t`u bërë bashkë, si katalizatorë të ndryshimeve pozitive në shoqëri, për të diskutuar dhe krijuar zgjidhje dhe veprime të përbashkëta në të ardhmen.
Në vijimësi të vitit të kaluar, në linjë edhe me shpalljen e vitit 2024 si “Viti Evropian i Aftësive”, nga Komisioni Evropian, edhe këtë vit tematika në fokus të JSHC do të jetë “Aftësi për të gjithë: Për të mësuar, punuar, angazhuar”.
Java përfshin një seri aktivitetesh lokale organizuar nga aktorë të shoqërisë civile në mbarë vendin, si dhe një event kombëtar i cili mbledh bashkë të gjithë grupet e interesit si organizata të shoqërisë civile, aktivistë, donatorë, institucione qeverisëse në nivel vendor dhe qendror, institucione akademike, biznese, media etj. në panele diskutimi dedikuar temës në fokus të javës. Natyra e aktiviteteve lokale është e larmishme dhe gjithëpërfshirëse, duke përfshirë forume diskutimi, seminare, sesione informimi dhe ndërgjegjësimi, evente rrjetëzimi dhe shkëmbimi praktikash të mira, vizita apo ture, ditë të hapura, programe trajnimi, festivale dhe panaire apo aktivitete të tjera advokuese etj.
Qendra Kombëtare Burimore për Shoqërinë Civile në Shqipëri është një nismë e Partnerëve Shqipëri për Ndryshim dhe Zhvillim, zbatuar në partneritet me Qendrën Shqiptare për Popullsinë dhe Zhvillimin (ACPD) dhe Lëvizjen Evropiane në Shqipëri (EMA), me mbështetjen e Bashkimit Evropian.
Link: https://resourcecentre.al/sq/2024/04/18/java-e-shoqerise-civile-2024/