ALF zhvilloi përgjatë dy ditëve Takimin e Krerëve të Rrjeteve në Barcelonë, Spanjë, duke mbledhur rreth 30 krerë të Rrjeteve të Shoqërisë Civile dhe përfaqësues nga i gjithë rajoni Euro-Mesdhetar.
Në fjalën hapëse u bashkua Ambasadori Juan Lugo, Bordi i Guvernatorëve të ALF, Spanjë, dhe Z. Senén Florensa, President Ekzekutiv i IEMed dhe Kryetar i Rrjetit ALF, Spanjë, si dhe online znj. Katerina Wolfová, Kryetare e Njësisë për Afrikën e Veriut-Egjipt në Paktin për Mesdheun (MENA.A.2). Znj. Wolfová foli për Paktin për Mesdheun dhe theksoi rolin e ALF në zhvillimin e Planit të Veprimit dhe rolin e Rrjeteve të Shoqërisë Civile në zbatimin e tij.
Gjatë datave 24 dhe 25 Nëntor, Sekretariati i ALF-së ndau me Krerët e Rrjeteve përditësime mbi aktivitetet dhe planet e ardhshme. Krerët e Rrjeteve gjithashtu organizuan sesione informuese, drejtuan diskutime dhe ndanë njohuritë dhe përvojat e tyre mbi praktikat efektive të shoqërisë civile dhe temat kryesore relevante për rajonin. Sesionet mbuluan një sërë temash, të tilla si: forcimi i bashkëpunimit dhe ndarjes së burimeve në të gjithë rajonin euro-mesdhetar, promovimi i rezistencës së shoqërisë civile dhe angazhimit të të rinjve, si dhe eksplorimi i qasjeve inovative për të luftuar dezinformimin dhe polarizimin në internet.
Një prej sesioneve, me tematikë qëndrore polarizimin shoqëror në Rajonin Euro-Mesdhetar u organizua dhe u moderua nga Koordinatorja për Rrjetin Kombëtar Shqiptar ALF, Dorentina Hysa.
“Nga diskutimet me kolegët pjesëmarrës, kuptuam se pavarësisht dallimeve në realitetet kombëtare, polarizimi i shoqërisë në thuajse 43 shtetet e Rajonit po thellohet gjithnjë e më tepër.
Interesat politike, narrativat përçarëse në media dhe dezinformimi, pabarazitë shoqërore dhe mungesa e ndërveprimit mes grupeve të ndryshme, u renditën si sfidat kryesore që e thellojnë polarizimin në Rajon veçanërisht për çështje që lidhen me emigracionin, etninë, fenë dhe gjininë.
Sugjerimet për zbutje të polarizimit theksojnë rëndësinë e edukimit dhe zhvillimit të kompetencave ndërkulturore të qytetarëve të vendeve tona. Padyshim, edukimi është investim afatgjatë dhe i sigurt, por që kërkon bashkëpunim shumëpalësh.”- shprehet Dorentina në një postim.